O, rattlin, roarin Willie,
O, he held to the fair,
An' for to sell his fiddle
And to buy some other ware;
But parting wi' his fiddle,
The saut tear blin't his e'e -
And, rattlin, roarin Willie,
Ye're welcome hame to me!

' O Willie, come sell your fiddle,
O, sell your fiddle sae fine!
O Willie come sell your fiddle
And buy a pint o' wine!'
' If I should sell my fiddle,
The warld would think I was mad;
For monie a rantin day
My fiddle and I hae had.'

As I cam to Crochallan,
I cannily keekit ben,
Rattlin, roarin Willie
Was sitting at yon boord-en':
Sitting at yon boord-en',
And amang guid companie!
Rattlin, roarin Willie,
Ye're welcome hame to me.